03.09.2018

Cəbrayıl məktəbliləri  “Gələcəyi  kodlaşdır” lahiyəsində iştirak edəcəklər

Avqustun 14-də bir qrup maarifçi gənclərin təşəbbüsü ilə ərsəyə gələn “Gələcəyi kodlaşdır” (Code for Future) layihəsinə start verildi. . İlk olaraq Biləsuvar rayonu ərazisində məcburi köçkünlər üçün salınmış qəsəbələrdə yaşayan, VII-IX sinif şagirdlərinin iştirak etdiyi layihədə məktəblilərə kodlaşdırmanın əsaslarını öyrənəcək, Scratch, HTML kimi proqramlaşdırma dilləri ilə yaxından tanış olacaqlar.Ölkənin qabaqcıl tədris müəssisələrindən olan “Code Academy”nin dəstəyi ilə start verilən layihədə 6-15 sentyabr 2018-ci il tarixlərində seçilmiş 45 məcburi köçkün uşaqları üçün 10 günlük sürətləndirilmiş tədrisin keçirilməsi planlaşdırılır. Əksəriyyəti qızlardan ibarət olan seçilmiş tələbələrə təlimlər xüsusi təşkil edilmiş tədris düşərgəsində (“Bootcamp”) keçirilcək.“Code Academy”nin təcrübəli müəllimləriylə yerli İKT müəllimlərini bir araya gətirən layihənin hədəflərindən biri də məcburi köçkün məktəblərinin bu sahədə tədris potensialının gücləndirilməsidir.Layihədə iştirak edəcək şagirdlər sentyabr ayın əvvəlində müsabiqə yolu ilə seçiləcək. Seçilmiş şagirdlərə “Code Academy”nin peşəkar təlimçiləri 10 gün ərzində intensiv kodlaşdırma öyrədəcəklər. Təlim zamanı fərqlənən iştirakçıların kompüter və mobil telefon kimi dəyərli hədiyyələr və “Code Academy”də təhsil almaq imkanı əldə edəcəklər.

Layihənin açılış mərasimində iştirak edən yerli icra hakimiyyəti orqanı nümayəndələri, müəllim və valideynlərə proqram barədə geniş məlumat verildi. “Gələcəyi kodlaşdır” komandasının rəhbəri Xalisə Şahverdi yerli məktəb şagirdlərini bu proqramda iştirak etməyə və gələcəyin ən önəmlı bacarıqlarından olan kodlaşdırmanı öyrənməyə səslədi.

“Gələcəyi kodlaşdır” proqramı Amerika Birləşmiş Ştatlarının Azərbaycandakı Səfirliyi tərəfindən yerli icmaların inkişafı və inklüziv tərəqqinin artırılması məqsədilə dəstəklənir.Məktəblilərə dəqiq elmləri öyrətməyi, yeni kəşflər etməyi və yeni dostluqlar qazandırmağı qarşısına məqsəd qoyan “Gələcəyi kodlaşdır” layihəsində iştirak pulsuzdur.